《森女是這樣練成的-3 Days Pampas Tour》
平時只會係discovery channal睇到既Amazon 森林，今日竟然可以親身到訪當然要玩盡佢。3日pampas hea遊河流溪澗加4日jungle semi-survival生還者之旅，雖然見唔到好多動物，但總算一嘗做森女滋味。
由La Paz坐15-18鐘頭亡命巴士入Rurrenabaque 就可以輕鬆進入玻國Amazon區域。通常所有人必玩既一定係3日pampas tour，因為最容易見到動物，又hea唔使腦力同勞力，CP值頗高但旅遊味極濃，亦有破壞生態之嫌，站在道德高地之士可能要三思而行。
巴士朝早5點幾到埗，坐到天光就出城即日報團無難度亦應該係最平既玩法。9點出發，坐3個鐘車加一個鐘船入pampas。沿途入去已經可以見到好多不知名雀仔，粉紅色海豚乜乜乜，然後就到重頭戲-->同馬嬲仔玩遊戲！只要導遊一拎香蕉，成班馬嬲就會由草叢跳出黎，擒上擒落直至搶曬所有香蕉。然後夜晚就會出去睇短吻鱷，好彩既導遊會搵到隻鱷bb 比你拎住慢慢影。過程係好開心既因為真係可以同佢地零距離接觸，但唸深一層其實人類到底憑咩去干擾大自然生態。
第二日出發尋找巨蟒，不過其實好難先有機會見到。因為佢地可能食左一隻牛就會訓足一年先再起身搵野食。而我地就只係搵到一條長長地既蛇，見住佢比十幾個人傳黎傳去，其實我都有d登佢可憐。食完lunch就繼續行程-->釣食人魚！導遊會切好肉粒再分比大家，釣唔釣到就睇你造化啦。釣到就有得加餸，不過其實食落同普通魚無乜分別。夜晚睇埋個世界級森林日落就完成行程。建議夜晚自己行出船頭睇埋個世界級星空就perfect啦。
最後一日如果好天既可以出去睇日出，之後就去同海豚游水。好多人都係為左呢part先報團，但其實我自己覺得呢part真係還好。因為河水極混濁，能見度極低潛唔到水，要海豚浮上水面先見到。如果好彩既，海豚會主動游過黎係水底掂你，但個人認為禁樣其實唔算同海豚游水掛，不過見到佢地係面前游黎游去都係開心既。
Pampas三日兩夜團基本上兩晚都係住係棚屋上面，早午晚三餐都安排好好，床鋪整齊有蚊帳，朝早重有馬嬲叫醒你。另外留意反，出出入入都會有一架疑似狂漏油既小艇載你，由朝到晚會有幾億隻蚊就算隔住條褲都盡心盡力幫你抽血，夜晚會有好似痾尿禁多既凍水比你沖涼，100%包你帶住成身泥同痕到崩潰既雙腳返Rurrenabaque。
------
3日2夜pampas tour
價錢:~450-500hkd 外加150入場費
內容:餵馬嬲、觀鳥/動物(水豚、大嘴鳥⋯）、同海豚游水、釣食人魚⋯
Agent: inka tour(唔太記得，類似係禁）
要讚：三餐好豐富唔怕餓親，每日都有重點唔會悶親，包你一定點都睇到同接觸到動物。
要留意：極旅遊化而且有破壞生態之嫌，有潔癖同極惹蚊既唸清楚先好報團。
------
之後會再update 比較少人會玩但其實好正既survival 團，想知點樣係森林入面生活回歸大自然，自己生火搭屋釣魚食蟲搵水源blablabla就要stay tuned!
去Ig睇多d森林靚相： wanderlustkanya
Search